要列舉巴黎最優秀嘅博物館,一啲都唔容易!呢座城市囊括大約 130 間博物館,而且本身就已經係值得展覽嘅曠世瑰寶,點會唔成為歷史、藝術、建築或者軍事發燒友嘅 No. 1 必遊勝地?

    由羅浮宮 (Louvre) 到奧蘭治宮 (Orangerie)、由大皇宮 (Grand Palais) 到蓬皮杜藝術中心 (Centre Pompidou),旅程之上,你可以隨時遊覽知識、文化同埋創作殿堂,為假期增光添彩。而我哋可以做嘅,就只係竭盡所能,為你介紹最具影響力、最能夠「寓教於樂」嘅巴黎觀光景點喇!

    1

    羅浮宮

    • 歷史文化`
    • 拍照

    羅浮宮 (The Louvre) 美術館面積超過 70,000 平方米,係世界上最大嘅藝術博物館之一,坐落於巴黎市中心塞納河 (Seine River) 岸旁嘅 13 世紀宮殿裡面,訪客人次冠絕全法國!如此「殿堂級」嘅地方,收藏品當然都大有來頭,舉凡達文西畫作《蒙娜麗莎 (Mona Lisa)》、《薩莫色雷斯島的勝利女神 (Winged Victory of Samothrace)》雕像、米開蘭基羅嘅《垂死的奴隸 (Dying Slave)》雕像等等,數之不盡,帶你一路探索人類藝術史。

    地點: 法國巴黎第一區 (1st Arrondissement) 里沃利街 (Rue de Rivoli)

    開放時間: 星期五及星期三 09:00 至 22:00;其他日子 09:00 至 18:00 (逢星期二休館)

    地圖
    2

    奧賽博物館

    • 歷史文化`
    • 拍照

    奧賽博物館 (Orsay Museum) 坐落喺 19 世紀末落成嘅舊火車站裡面,館內嘅印象派繪畫藏量屬世界之最,展出嘅畫作同雕塑多達 2,500 幾件,有梵高 (Van Gogh)、高更 (Gauguin)、雷諾瓦 (Renoir) 同塞尚 (Cézanne) 等名家嘅傑作。另一方面,博物館嘅建築本身就係一件藝術品,不妨去火車站古董時鐘旁邊嗰間 Café,坐低飲杯嘢,充分感受吓呢個地方嘅永恆魅力吖!

    地點: 塞納河南岸 (River Seine) 榮譽軍團街 (Rue de la Légion d'Honneur) (羅浮宮博物館斜對面)

    開放時間: 星期二至日 09:30 至 18:00 (逢星期四 21:45 關門;逢星期一休館)

    地圖
    3

    橘園博物館

    • 歷史文化`
    • 拍照

    橘園博物館 (Orangerie Museum) 面積只有 6,300 平方米,規模唔算大,但係館內嘅印象派繪畫主要藏品就意義重大喇!博物館有 2 間特設展室,陳列莫奈 (Claude Monet) 嘅《睡蓮 (Water Lilies)》,仲有臨時展覽同常設展覽,展品大多數出自印象派同後印象派藝術家手筆,當中包括畢加索 (Pablo Picasso)、莫迪里安尼 (Amedeo Modigliani) 同盧梭 (Douanier Rousseau) 等等嘅藝壇巨人。

    地點: 法國巴黎塞納河 (River Seine) 北岸杜樂麗花園 (Jardin des Tuileries) 西端

    開放時間: 星期三至一 09:00 至 18:00 (逢星期二休息)

    地圖

    相片由 Traktorminze 提供 (CC BY-SA 3.0) 經修改

    4

    羅丹美術館

    • 歷史文化`
    • 拍照

    羅丹美術館 (Rodin Museum) 位於 18 世紀比隆酒店 (Hotel Biron) 裡面,毗鄰巴黎市中心嘅軍事博物館 (Army Museum),會帶你了解關於羅丹 (Rodin) 嘅一切,順道欣賞佢最出名嘅藝術品。羅丹為後世留低咗精彩豐富嘅藝術遺產,由《沉思者 (The Thinker)》、《地獄之門 (Gates of Hell)》以至其他大量雕塑、素描同陶瓷作品,通通都從佢昔日嘅工作室搬到美術館;而好多雕像都擺咗喺秀麗如畫嘅戶外花園度,仲唔揀返個風和日麗嘅日子嚟參觀?你可以拎住部語音導覽機,深入認識呢位傑出嘅法國藝術家。

    地點: 法國巴黎華漢街 (Rue de Varenne) 軍事博物館榮軍院 (Les Invalides) 東側

    開放時間: 每日 10:00 至 17:45

    地圖
    5

    蓬皮杜藝術中心

    • 伴侶
    • 家庭
    • 歷史文化`
    • 拍照

    平心而論,蓬皮杜藝術中心 (Centre George Pompidou) 最出名嘅地方,唔係佢喺國立現代藝術博物館 (National Museum of Modern Art) 所收藏嘅珍品,反而係佢本身前衛嘅建築。除咗博物館之外,大樓仲設有圖書館、音樂中心,同埋豪華嘅屋頂酒吧連餐廳;而館內常設展覽同臨時展覽展出咗畢加索 (Pablo Picasso)、安迪華荷 (Andy Warhol) 同菲利普斯塔克 (Philippe Starck) 等名人畫家同設計師嘅鉅作,為展館更添生氣。

    地點: 城島 (Cité Island) 以北 550 米蓬皮杜廣場 (Place Georges Pompidou) 上

    開放時間: 星期三至一 11:00 至 21:00 (逢星期二休館)

    地圖
    6

    軍事博物館

    • 歷史文化`
    • 拍照

    軍事博物館 (Army Museum) 以所在嘅建築群命名,法文係「les Invalides」,譯做「榮軍院」,館內收藏咗法國軍隊喺歷史長河上使用過嘅武器同制服。數到建築群內最重要嘅部分,點可以唔提榮軍院圓頂教堂 (Dôme des Invalides)?拿破崙一世陵墓 (The Tomb of Napoleon I) 就喺入面!呢座博物館規模龐大,將會帶你探索戰爭嘅藝術,其中詳盡介紹咗法國軍隊歷年嘅無數重大軍事事件,源遠而輝煌。

    地點: 法國巴黎第 7 區 (7th Arrondissement) 塞納河 (River Seine) 南岸格勒納勒街 (Rue de Grenelle) 129 號

    開放時間: 4 月至 10 月:每日 10:00 至 18:00;11 月至 3 月:每日 10:00 至 17:00

    地圖
    7

    大皇宮

    • 歷史文化`
    • 拍照

    大皇宮 (Grand Palais) 專為 1900 年世界博覽會而開幕,坐落於巴黎其中一座最宏偉嘅建築群裡面,設有一個展覽廳同兩間博物館,獲列入歷史古蹟,最出名嘅係用鐵框同輕鋼框配襯嘅玻璃屋頂。身處館內,你可以欣賞到國家美術館 (National Art Galleries) 嘅臨時藝術展覽,西翼就有科學館同天文館。行完展館,你仲可以去埋建築群東南角落富麗堂皇嘅 Mini Palais 飲杯 Cocktail、食餐飯,盡情嘆返吓。

    地點: 法國巴黎塞納河 (River Seine) 北岸軍事博物館對面艾森豪威爾將軍大街 (Avenue du Général Eisenhower) 3 號

    開放時間: 星期三至一 10:00 至 20:00 (逢星期二休息)

    地圖
    8

    建築與傳統博物館

    • 歷史文化`
    • 拍照

    建築與傳統博物館 (Museum of Architecture and Heritage) 坐落喺投卡德候廣場 (Place du Trocadéro) 嘅夏樂宮 (Palais de Chaillot) 內,喺正艾菲爾鐵塔 (Eiffel Tower) 對面,珍藏咗法國豐富嘅建築遺產,展示重構建築元素、全幢建築物拆毀復原等等嘅浩翰工程,帶你探索法國由 12 世紀至今喺設計同建造方面嘅進程。博物館嘅一大特色,就係俾你親身見證哥德式大教堂地下室全面重建嘅過程,令人大開眼界!

    地點: 法國巴黎投卡德候廣場嘅夏樂宮內

    開放時間: 星期三至一 11:00 至 19:00 (星期四 21:00 關門;逢星期二休館)

    地圖
    9

    布朗利河岸-希拉克博物館

    • 歷史文化`
    • 拍照

    布朗利河岸-希拉克博物館 (Quai Branly – Jacques Chirac Museum) 專為保存非洲、亞洲、太平洋同美洲原住民藝術同文化而設,以所在地同埋下令建造展館嘅前法國總統命名,館藏超過 400,000 件,其中 3,500 件係常設展品。身處館內,你可以喺時尚佈置之下,透過互動展覽探索嚟自世界各地嘅原始藝術品。

    地點: 法國巴黎布朗利河岸,塞納河畔 (River Seine) 艾菲爾鐵塔 (Eiffel Tower) 以北 400 米

    開放時間: 星期四至六 11:00 至 21:00;星期日至三 11:00 至 19:00 (逢星期一休館)

    地圖
    10

    巴黎達利美術館

    • 歷史文化`
    • 拍照

    巴黎達利美術館 (Dalí Paris) 位於蒙馬特山丘 (Montmartre Hill) 側邊嘅小丘廣場 (Place du Tertre),係規模唔大嘅私人博物館,裝載住薩爾瓦多達利 (Salvador Dali) 嘅超現實世界,多面向展示佢豐富趣怪嘅想像力,展品包括大約 300 幅藝術品原作。你可以喺呢度透過達利嘅畫作、雕塑、雕刻同攝影作品,了解呢位古怪藝術家所沉迷嘅各種藝術形式。

    地點: 法國巴黎波爾伯街 (Rue Poulbot) 11 號 (蒙馬特山丘側邊嘅小丘廣場附近)

    開放時間: 每日 10:00 至 18:00

    地圖

    相片由 Jeremy Polanski 提供 (CC BY 2.0) 經修改

    Stephan Audiger | 旅遊常客

    開始計劃行程

    Maps