倫敦 10 種獨特購物體驗

倫敦購物熱點同必買產品

    倫敦係極盡精彩嘅購物勝地,各式各樣嘅得意市集無疑係亮點之一,而倫敦好幾個地方亦都有賣精品時裝。

    無論你想搵名牌定係復古收藏品,倫敦總有一度啱你心水!想瘋狂 Shopping?咁就要及早規劃喇!因為,通常週末先係最適合行市集嘅時機;而星期六嘅購物街會人頭湧湧,最好盡量喺閒日去,避開人潮。

    1

    牛津街

    特色:最多姿多彩嘅高級街頭時尚

    牛津街 (Oxford Street) 係世界上最繁忙嘅街道之一,熙來攘往嘅人群駐足一間又一間嘅商舖同百貨公司裡面,搶購最優質嘅高級街頭時裝、運動服,同埋英國最知名品牌產品,當中又以 Selfridges 百貨公司最受歡迎。

    如果想去牛津街朝聖嘅話,你可以搭地鐵到托登罕宮路 (Tottenham Court Road) 站,沿住大街一路「血拚」到街尾嘅大理石拱門 (Marble Arch)。牛津圓環站 (Oxford Circus) 大概位於牛津街中間位置,都幫到你認路架!聖誕佳節前後,牛津街特別五光十色,有成千上萬嘅閃爍燈飾,同天馬行空嘅櫥窗陳列,令人目不暇給。

    • 購物
    2

    騎士橋

    特色:高級名牌服裝

    倫敦西區嘅騎士橋 (Knightsbridge) 係市內名牌勝地,成個地區橫跨肯辛頓 (Kensington) 同切爾西 (Chelsea),散發住上流社會嘅氣氛,特別係喺兩間舉世聞名嘅百貨公司 Harrods 同 Harvey Nichols 之間,感覺零舍 High Class;

    其中,Harvey Nichols 仲開設咗精品設計師時裝店,可能係全倫敦服務最周到嘅名店,絕對不容錯過!沿住斯隆街 (Sloane Street) 繼續行,精品店繼續琳瑯滿目,諸如 Salvatore Ferragamo、Dolce & Gabbana、Moncler 同埋 Louis Vuitton 通通任你盡買。

    另一方面,肯辛頓地區嘅酒店富麗堂皇,百分百襯得上呢堆名店嘅格調。

    • 購物
    • 豪華住宿
    3

    薩佛街

    特色:男裝裁縫店

    如果你想整返套「四四正正」嘅西裝,去薩佛街 (Saville Row) 就啱喇!呢條街位於倫敦市中心梅菲爾區 (Mayfair),區內嘅裁縫店已經有幾百年歷史。唔講你唔知—據稱,燕尾服就係喺呢條街嘅裁縫店發明架喇!

    度身訂造西裝嘅過程係一種好特別嘅體驗,店員會喺充滿迷人氣息嘅試身室為你服務,通常仲會提供飲品添。要整一套 Fit 到漏嘅西裝,至少都要試身三次,所以記住預留足夠時間喎。喺薩佛街最享負盛名嘅裁縫店裡面,一套西裝或者燕尾服可以賣成幾千英鎊;不過,呢度都仲有好多比較大型嘅服裝店賣現成嘅西裝嘅,例如 Alexander McQueen 同埋 Gieves & Hawkes,就係唔錯嘅選擇。

    • 購物
    • 豪華住宿
    4

    史比特市集

    特色:新興設計師時尚

    史比特市集 (Spitalfields Market) 以走在潮流尖端嘅時裝店同古董店聞名,全場氣氛勁正,每日營業,而到週末仲有倫敦最優秀嘅獨立設計師出動,售賣各種精選手工作品添!場內各式各樣嘅時裝風格都有,既有印滿漫畫設計嘅女裝乾濕褸,亦都有「非洲風」嘅帽。如果你住喺利物浦街站 (Liverpool Street) 附近嘅酒店,行幾步就到市集架喇!

    史比特市集除咗係 Shopping 天堂,仲設有濕貨市場,俾你選購新鮮食材,又或者去種類繁多嘅特許經營餐廳醫吓肚都得。如果你想著住新買嘅潮衫「曬命一番」,可以行去埋附近嘅布里克巷 (Brick Lane) 同潮區肖迪奇 (Shoreditch),吸引大眾眼球。

    地點: Brushfield Street, London, E1 6EW

    開放時間: 每日 11:00 至 19:00

    電話: +44 (0)20 7247 8556

    • 購物
    5

    康登市集

    特色:騎呢潮物

    康登市集 (Camden Market) 係反文化運動嘅中心,永遠都活力十足,雲集小眾特色攤檔,Punk 時裝又有,手工銀飾都有,種類多不勝數。鍾意買平嘢嘅人,就一定會愛上康登市集,因為呢度啲貨色比起倫敦其他購物熱點平一大截!搭地鐵北線 (Northern Line) 去到康登城站 (Camden Town) 落車,再行去康登洛克 (Camden Lock),就嚟到架喇。

    除咗行街「血拚」,市集裡面仲有啲出色小食檔,出售各式各樣嘅地道美食。Shopping 過後,仲唔捨得走?運河一帶都有啲唔錯嘅酒吧同喜劇表演場所,歇腳一流!

    地點: Camden Lock Market, Camden Town, London NW1 7BX, United Kingdom

    開放時間: 每日 10:00 至 18:00

    電話: +44 (0)20 3763 9900

    • 購物
    • 經濟實惠
    • 非一般行程
    6

    Westfield London 購物中心

    特色:全天候 Shopping 勝地

    英國嘅購物中心規模一般唔及亞洲或者美國,但 Westfield 好明顯係例外!呢個龐大嘅零售商場擁有幾百間名牌店,雖然當中大部分商品都可以喺倫敦其他地方搵到,但係 Westfield London 勝在提供免費泊車服務,而且唔受天氣影響。臨近聖誕佳節,大部分倫敦人都會嚟呢度買嘢過節架!

    Westfield London 位於倫敦西部漢默史密斯 (Hammersmith) 附近;如果你決定 Book 倫敦東部嘅住宿,去 Westfield London 嘅姊妹商場 Westfield Stratford City 會就腳啲。

    地點: Ariel Way, London W12 7GF, United Kingdom

    開放時間: 星期一至六 10:00 至 22:00 (星期日 12:00 至 18:00)

    電話: +44 (0)20 3371 2300

    • 購物
    7

    波多貝羅路

    特色:古董

    波多貝羅路市集 (Portobello Road Market) 係世界上最大型嘅古董市場之一,貫穿成個諾丁山 (Notting Hill),雖然以星期六嘅主市集最出名,但呢度其實一星期開足 6 日嘅。場內都有啲平價貨,而大部分貨色係獨一無二嘅高檔古董,價錢自然有返咁上吓…貴啦!

    貴為倫敦 No.1 嘅古董買賣場所,波多貝羅路附近一帶嘅時尚氛圍亦都值得好好感受。市集距離地鐵拉德伯克街站 (Ladbroke Grove) 好近,行路幾分鐘就到;你亦都可以 Book 位於諾丁山本區嘅酒店落腳,等自己有多啲時間埋首於波多貝羅路一排排嘅古董店之中,肆意尋寶,買勻時鐘、郵票以至名牌復古時裝!

    地點: Portobello Road, London, W11, United Kingdom

    開放時間: 星期一至三 09:00 至 18:00;星期四 09:00 至 13:00;星期五至六 09:00 至 19:00 (星期日休息)

    • 購物
    • 豪華住宿
    8

    Harrods

    特色:精緻紀念品

    Harrods 集經典傳統同高級名店於一身,係倫敦嘅熱門旅遊勝地。雖然而家 Harrods 已經冇再堅持昔日對顧客衣著嘅要求,但係 18 歲以下人士依然必須由成人陪同,先可以入去。

    呢間百貨公司偌大廣闊,設有時裝部、珠寶部、紀念品部、玩具部等等,仲有好多精緻美食添!好多顧客都鍾意去 The Georgian 餐廳嘆個下午茶唞返吓,而你亦都可以隨心開返枝香檳淺酌。自 1849 年開業以嚟,Harrods 一直售賣別具特色嘅商品,殷勤服務大眾,秉持「古早」氣息,成功令顧客有賓至如歸嘅感覺。

    地點: 87-135 Brompton Rd, Knightsbridge, London SW1X 7XL, United Kingdom

    開放時間: 星期一至六 10:00 至 21:00 (星期日 11:30 至 18:00)

    電話: +44 (0)20 7730 1234

    • 購物
    • 歷史文化`
    • 拍照
    • 豪華住宿
    9

    國王路

    特色:奢華時尚

    切爾西高街 (Chelsea High Street) 曾經係國王嘅私家路,但由於而家街道兩邊都起滿咗豪宅,所以已經變成溫文爾雅嘅現代社區喇!短短唔夠 2 公里嘅路,已經林立住幾百間精品時裝店、餐廳同美術館,難怪有錢人最鍾意嚟呢度買嘢。

    不如搭地鐵去斯隆廣場站 (Sloane Square),「血拚」一陣,坐低食少少嘢,先再繼續 Shop 過啦!國王路嘅知名品牌包括 Club Monaco、Kate Spade 同 All Saints;萬一天氣不似預期,你都仲可以去 Peter Jones 百貨公司大買特買嘅。

    地點: 英國倫敦國王路

    • 購物
    • 豪華住宿

    相片由 Carlos Cunha 提供 (CC BY-SA 3.0) 經修改

    10

    卡爾納比街

    特色:青春時尚

    由牛津圓環 (Oxford Circus) 向南行一小段路,就會去到出名賣後生仔時裝嘅卡爾納比街 (Carnaby Street)。呢條短短嘅步行街喺 1960 年代成為倫敦時尚文化中心,美譽維持至今;

    嚟到現代,唔少獨立零售商已經俾名牌店同平價手信店取代,其中嘅知名品牌包括 Diesel、Lazy Oaf、Office 鞋店等等。另一方面,呢區嘅酒吧都唔錯架!

    地點: Carnaby St, Soho, London W1F, UK

    • 購物
    Paul Smith | 旅遊常客

    開始計劃行程

    Maps