布魯塞爾 10 大最好玩活動

布魯塞爾最出名嘅係乜嘢?

    布魯塞爾係比利時嘅首都,極具比利時特色,到處都係裝飾藝術風格嘅小酒館、別具一格嘅佛蘭德藝術、高聳嘅哥德式大教堂,同埋古樸嘅公會房屋。市內一年四季舉辦各式各樣嘅活動,仲有開滿鮮花嘅公園、建築古蹟、歷史文化同藝術,等你一一探索;再加上著名嘅比利時朱古力同埋數之不盡嘅本地啤酒,肯定令你大飽口福!

    布魯塞爾有一座 19 世紀購物廊,係歐洲數一數二嘅「血拚」天堂,裡面雲集一系列高檔名牌,其中一啲品牌仲曾經為比利時王室設計服裝添!市中心嘅鵝卵石小路兩邊林立米芝蓮星級餐廳,亦都有裝飾藝術風格嘅木嵌板餐館。歡迎參考我哋嘅布魯塞爾旅遊指南,睇清楚不容錯過嘅飲食好去處同歷史景點,盡情享受一段充實假期!

    布魯塞爾最好玩嘅活動係乜嘢?

    1

    喺布魯塞爾大廣場展開一日行程

    布魯塞爾主保聖人聖彌額爾嘅鍍金雕像

    布魯塞爾大廣場 (Brussels Grand-Place) 係布魯塞爾嘅中心廣場,自 1998 年被列為聯合國教科文組織世界文化遺產,正正係市政廳 (Town Hall) 嘅所在地;而呢座建築嘅高柱同外牆相當引人注目,具有大量黃金細節,揉合哥德式、巴洛克式同路易十四時期嘅建築風格,中間仲有一座高聳塔樓,壯麗逼人!市政廳位於中央廣場,曾經被法國攻擊,後來於 1695 年重建,而家已經成為布魯塞爾人氣最旺遊客區嘅一部分。

    地點: Grand-Place, 1000 Brussels, Belgium

    • 歷史文化`
    • 拍照
    2

    必睇景點:撒尿小童像

    一睹奇裝異服嘅布魯塞爾青銅吉祥物

    撒尿小童 (Mannekin Pis) 位於布魯塞爾哥德式市政廳嘅西南方,係一座「身高」61 厘米嘅男仔雕像,擺出「屙殊殊」嘅動作,「本尊」源於 17 世紀,喺布魯塞爾城市博物館 (Brussels City Museum) 展出緊,而大家呢度見到嘅只係佢嘅青銅複製品。

    撒尿小童像喺 18 世紀兩次被偷,亦曾經喺 19 世紀被摧毀,難得佢到今時今日都仲可以招招積積咁喺度屙殊殊,仲成為布魯塞爾最具幽默感嘅吉祥物添!撒尿小童像每星期都會「換衫」幾次,喺特別日子就打扮得更加醒神。

    地點: 1000 Brussels, Belgium

    地圖
    • 家庭
    • 拍照
    • 經濟實惠
    3

    喺五十周年紀念公園唞返吓

    參觀人類激情之廟

    位於布魯塞爾歐洲區 (European Quarter) 最東端嘅五十周年紀念公園 (Parc du Cinquantenaire) 係源於 19 世紀嘅城市公園,紀念比利時獨立 50 周年,

    園內嘅 U 形拱廊令人印象深刻,裡面設有汽車世界博物館 (AutoWorld Museum)、皇家軍事博物館 (Royal Military Museum),同埋五十周年紀念公園博物館 (Jubelpark Museum)。行到去五十周年紀念公園嘅西北端,你仲可以參觀埋布魯塞爾大清真寺 (Great Mosque of Brussels) 同人類激情之廟 (Temple of Human Passions) 添!

    地點: Parc du Cinquantenaire, 1000 Brussels, Belgium

    地圖
    • 伴侶
    • 家庭
    • 拍照
    • 經濟實惠
    4

    去聖休伯特拱廊街 Shopping

    喺高級購物廊睇盡高檔名牌

    聖休伯特拱廊街 (Galeries Royales Saint-Hubert) 係布魯塞爾大廣場附近嘅高檔購物廊,採用玻璃頂設計,建於 19 世紀中葉,雲集一眾精品時裝名牌產品,當中有啲設計師仲曾經為比利時皇室成員整衫添!

    如果你係比利時朱古力果仁糖嘅 fans,就一定要去 Neuhaus 嘅始創店—呢間舖頭由 1857 年開始,就係聖休伯特拱廊街嘅租客嚟架喇。另一方面,布魯塞爾其中一間皇家劇院 Théâtre des Galeries 都喺呢度,演出古典話劇同輕歌劇等節目。

    地點: Galerie du Roi 5, 1000 Brussels, Belgium

    電話: +32 (0)2 545 09 90

    地圖
    • 購物
    • 豪華住宿
    5

    必睇景點:聖彌額爾聖古都勒主教座堂

    哥德式教堂免費導賞團

    聖彌額爾聖古都勒主教座堂 (The Cathedral of St Michel and Gudula) 嘅歷史可以追溯到 9 世紀,係布魯塞爾最古老嘅建築之一,坐落山頂,建築風格受巴黎聖母院 (Notre Dame) 啟發,拱形天花配襯 16 世紀彩色玻璃窗,同堂外布魯塞爾天際線嘅靚景相映成趣。

    呢間教堂有幾處考古遺跡向公眾開放,當中包括唱經樓下面保存完好嘅羅馬式墓穴。如果你想了解聖彌額爾聖古都勒主教座堂嘅歷史,仲可以向布魯塞爾教堂及旅遊局 (Eglise et Tourism 或 Church and Tourism of Brussels) 報名,參加免費導賞團添!

    地點: Place Sainte-Gudule, 1000 Brussels, Belgium

    開放時間: 星期一至五 07:00 至 18:00;星期六至日 08:00 至 18:00

    電話: +32 (0)2 217 83 45

    地圖
    • 伴侶
    • 歷史文化`
    • 拍照
    • 經濟實惠

    相片由 Filip Maljković 提供 (CC BY-SA 2.0) 經修改

    6

    原子球塔

    由球塔頂欣賞比利時風景

    原子球塔 (Atomium) 建於 1958 年,係比利時最受歡迎嘅景點之一,高 102 米,飾有 9 個相互連接嘅球體,其中 6 個係展覽館,介紹比利時嘅歷史、科學、設計同社會。

    搭 Lift 穿過球塔嘅中央管道之後,你仲可以行入其他管道同球體裡面—呢度嘅設計係將鐵晶體體心立方體放大 1,650 億倍而建,極致精密!搭多次 Lift,去到原子球塔最頂層嘅餐廳,布魯塞爾天際線全景旋即映入眼簾。夜晚再返嚟望吓,呢座地標建築會點著大約 3,000 盞燈,格外璀璨!

    地點: Square de l'Atomium, 1020 Brussels, Belgium

    開放時間: 每日 10:00 至 18:00

    電話: +32 (0)2 475 47 75

    • 拍照
    • 非一般行程
    7

    試食青口薯條

    白酒蒸新鮮青口,配炸粗切薯條

    青口薯條 (Moules et frites) 結合咗蒸青口同炸薯條呢兩種布魯塞爾特色菜,將一煲十幾隻青口用白酒、紅蔥頭、香芹加牛油蒸熟,配上粗切薯條,香軟酥脆滋味共冶一爐!

    每年 9 月至 12 月固然係享用呢道比利時名菜嘅最佳時節,但其實大部分小酒館一年四季都貨源不絕。當地人最常推薦嘅餐廳有 1882 年開業嘅古老小酒館 Au Vieux Bruxelles、供應 70 款口味嘅 Le Zinneke,同埋主打自家製薯條嘅 Le Chou de Bruxelles

    • 品嚐美食
    8

    霍塔博物館

    探索比利時建築師維克多·霍塔 (Victor Horta) 嘅家鄉

    呢座博物館以比利時建築師維克多·霍塔 (Victor Horta) 命名,曾經係佢嘅住所同工作室,處處展現 19 世紀初典型嘅浪漫新藝術風格。爬上螺旋鐵樓梯,房室入面有霍塔本人設計嘅彩色玻璃窗、傢俬、器皿同藝術品。

    呢位傑出人物同布魯塞爾部分最經典嘅地標建築息息相關,當中包括被列為聯合國教科文組織世界文化遺產嘅聯排別墅,同埋五十周年紀念公園 (Parc du Cinquantenaire) 入面嘅人類激情之廟 (Temple of Human Passions)。09:00 至 12:00 及 14:00 至 16:30 有導賞團 (通常用法文、英文、荷蘭文同德文進行)。

    地點: Rue Américaine 25, 1060 Brussels, Belgium

    開放時間: 星期二至日 14:00 至 17:30 (逢星期一休館)

    電話: +32 (0)2 543 04 90

    地圖
    • 伴侶
    • 家庭
    • 歷史文化`

    相片由 Tom Parnell 提供 (CC BY-SA 2.0) 經修改

    9

    去米迪市集掃街

    美食市場手工朱古力琳瑯滿目

    米迪市集 (Marche du Midi) 主打各式各樣嘅新鮮農產品,食品攤檔眾多,啱晒鍾意行 Market 嘅人!每逢星期日朝早,呢個露天市場都喺布魯塞爾南火車站外架設起嚟,

    攤販多達 450 個,專售豐富多彩嘅美食,值得你花啲時間周圍行吓,仲可以免費試食比利時朱古力同芝士等等各種歐洲美食添!

    地點: Avenue Fonsny, 1000 Brussels, Belgium

    開放時間: 星期日 06:00 至 13:00

    • 購物
    • 品嚐美食

    相片由 Francisco Gonzalez 提供 (CC BY 2.0) 經修改

    10

    飲杯比利時啤酒,結束一日行程

    400 幾種生啤任君選擇

    布魯塞爾出品嘅生啤有成 400 幾種,話佢係啤酒發燒友嘅首選必遊之地,都好公道吖!如果你想同當地人飲返一、兩杯,市內有好多傳統小酒館俾你慢慢揀;

    而聖休伯特拱廊街 (Galeries Royales Saint-Hubert) 出面就有一間經典裝飾藝術風格嘅 A La Mort Subite 小酒館,供應車厘子味嘅 Lindemans Kriek;Delirium Café. 仲有將近 3,000 款啤酒,任你試勻添!

    • 晚間娛樂

    相片由 Patrick Despoix 提供 (CC BY-SA 4.0) 經修改

    Penny Wong | 旅遊常客

    開始計劃行程

    Maps