維也納位於寧靜嘅多瑙河邊,滿載 17 世紀嘅宏偉氣派,城市各處都有保存完好嘅古蹟,精美呈現醉人歷史。遊覽維也納嘅時候,你可以喺高聳嘅哥德式建築之間,漫步鵝卵石街道,傾聽耳邊迴盪嘅史特勞斯華爾茲音樂,體驗穿越時代、充滿活力嘅藝術文化。

    維也納嘅公共交通系統效率固然高;不過,如果想充分細賞呢個城市嘅一點一滴,最好都係按照個人步伐,漫遊其中。只要沿住寬廣嘅戒指路 (Ringstraße) 一直行,就可以輕輕鬆鬆遊遍維也納市中心。戒指路蜿蜒穿過步行街同廣場,兩邊林立好多個著名地標,睇都睇唔哂。你都嚟維也納一日遊,玩盡呢個「奧地利首都」啦!

    維也納最好玩嘅活動係乜嘢?

    1

    由斯蒂芬廣場展開一日行程

    喺維也納地理樞紐附近觀光

    斯蒂芬廣場 (Stephansplatz) 係位於維也納市中心嘅主要廣場,就連宏偉瑰麗嘅羅馬斯蒂芬大教堂 (Roman Catholic Stephansdom) 亦都屹立於此,屬於一眾繁華街道嘅相交點,商舖遍佈四周。而氣氛熱鬧嘅格拉本 (Graben) 購物街由斯蒂芬廣場分叉開嚟,位於廣場西南端、斯蒂芬廣場地鐵站 (Stephansplatz U-Bahn station) 旁邊,可以俾你喺街道中央嘅咖啡店坐低,遮蔭乘涼。鍍金嘅巴洛克式黑死病紀念柱 (Pestsäule) 壯觀非常,亦係維也納嘅另一座歷史地標,附近仲成日有街頭樂隊表演添!

    地點: Stephansplatz, 1010 Wien, Austria

    地圖
    • 伴侶
    • 歷史文化`
    • 拍照
    2

    必睇景點:聖史提芬大教堂

    碩大而令人敬畏嘅維也納地標

    聖史提芬大教堂 (St.Stephen's Cathedral) 擁有彩色瓷磚屋頂同高聳嘅尖頂,係世界上最華麗嘅哥德式建築之一,坐落於城市中心。行入堂內,你即刻會見到樓底極高嘅瑰麗中殿,裡面有巴洛克式裝飾,同埋色彩繽紛嘅彩色玻璃窗;位於中央嘅講壇係哥德式藝術傑作,上面嘅雕刻令人驚艷;而堂內仲有一尊由匿名雕塑家按照自己形象塑造嘅石雕人像,呈現打開窗偷望嘅姿勢,因而命名為《望窗者 (fenstergucker)》,為呢座嚴肅名勝增添幾分趣味。

    地點: Stephansplatz 3, 1010 Wien, Austria

    開放時間: 星期一至六 09:00 至 11:30 及 13:00 至 16:30;星期日 13:00 至 16:30

    電話: +43 1 515523530

    地圖
    • 歷史文化`
    • 拍照
    3

    乘搭維也納巨型摩天輪

    飽覽維也納全景嘅有趣旅程

    維也納摩天輪 (Wiener Riesenrad) 嘅歷史多姿多彩,1897 年由英國一班工程師設計,喺第二次世界大戰期間曾經遭到破壞,之後重建淨係用咗最初 30 個吊艙嘅一半。1987 年,經典占士邦電影《鐵金剛大戰特務飛龍 (The Living Daylights)》就係喺呢度取景!當吊艙升到摩天輪頂部,乘客就可以喺大約 65 米高處,盡賞維也納嘅全景。摩天輪門票大約係每人 EUR10。

    地點: Riesenradplatz 1, 1020 Wien, Austria

    開放時間: 每日 10:00 至 21:45

    電話: +43 1 7295430

    地圖
    • 伴侶
    • 家庭
    • 歷史文化`
    • 拍照
    4

    必睇景點:美泉宮

    富麗堂皇嘅建築群,周圍環繞裝飾精緻嘅花園

    只要參觀吓維也納呢座宏偉嘅巴洛克式宮殿,你就可以清楚了解 17 至 19 世紀歐洲皇室嘅生活方式。美泉宮 (Schönbrunn Palace) 大約有 1,400 間房室,原本嘅裝飾同傢俱都得以保留,其中 40 間房仲會開放俾導賞團旅客參觀,門票通常由每人 EUR14.20 起,一般包括參觀皇室公寓同壁畫美術館嘅費用。宮殿外面嘅美泉宮公園 (Privy Garden 或 Schönbrunner Schloss Park) 有一大片花壇,好值得花啲時間,喺園內漫步沉思。

    地點: Schönbrunner Schloßstraße 47, 1130 Wien, Austria

    開放時間: 每日 08:00 至 17:30

    電話: +43 1 81113239

    地圖
    • 伴侶
    • 歷史文化`
    • 拍照
    5

    喺美泉宮動物園探吓小動物

    世界上歷史最悠久嘅動物園

    美泉宮動物園 (Tiergarten Schönbrunn 或 Schönbrunn Zoo) 位於維也納市中心西南部嘅同名宮殿附近,係一片佔地 17 公頃嘅綠洲,歷史可以追溯到 1752 年,係全球最古老嘅動物園。園址嘅巴洛克式建築保存完好,有 700 幾個品種超過 8,000 隻動物住喺呢度,而且仲係世界上少數有大熊貓嘅動物園之一。行入去動物園內嘅亞馬遜雨林屋,栩栩如生嘅標本即刻映入眼簾,為你呈現地球另一邊截然不同嘅生物群落面貌。

    地點: Maxingstraße 13b, 1130 Wien, Austria

    開放時間: 每日 09:00 至 16:30

    電話: +43 1 87792940

    地圖
    • 家庭
    • 歷史文化`
    6

    佈滿奇花異草嘅棕櫚屋

    世界上最大型嘅同類植物展覽館

    喺維也納美泉宮四周,環繞住四個綠意盎然嘅植物綠洲,其中最出名嘅就係美泉宮棕櫚屋 (Palmenhaus Schönbrunn),以 19 世紀末新藝術風格嘅巨型溫室為焦點名勝,種咗嚟自全球各地幾千種植物。棕櫚屋嘅鋼鐵結構外部恰到好處咁漆上綠色,巨型鑄鐵柱呈現樹木形狀,支撐住中央部分嘅鋼筋同玻璃結構。遊客除咗可以入屋欣賞五顏六色嘅奇花異草之外,仲可以喺場內嘅餐廳享用維也納風味午餐。

    地點: Schlosspark, 1130 Wien, Austria

    開放時間: 每日 09:30 至 17:00

    電話: +43 1 8775087

    地圖
    • 伴侶
    • 家庭
    • 歷史文化`
    • 拍照
    7

    必睇景點:維也納自然歷史博物館

    欣賞大自然嘅傑作

    維也納自然歷史博物館 (Museum of Natural History) 收藏咗全球超過 3,000 萬件標本同手工藝品,令人驚嘆!館內分為兩個主要樓層,總共有大約 39 個展廳,展品種類由礦物、隕石、恐龍化石,以至脊椎動物同人類學立體透視模型都有。另一方面,博物館仲設有天文館,通過一系列全圓頂投影表演,帶你穿越太陽系每個角落,體驗驚喜處處嘅旅程。維也納自然歷史博物館入場費大約係每人 EUR12,19 歲或以下遊客免費。

    地點: Burgring 7, 1010 Wien, Austria

    開放時間: 星期四至星期一 09:00 至 18:30;星期三 09:00 至 21:00 (逢星期二休館)

    電話: +43 1 521770

    地圖
    • 家庭
    • 歷史文化`
    8

    喺風景優美嘅人民公園漫步

    維也納「人民花園」玫瑰陣陣幽香

    維也納人民公園 (Volksgarten) 名副其實「屬於人民」,歡迎市民同遊客沿住秀麗小徑步行,途經一個又一個玫瑰園,欣賞修剪整齊嘅花壇。穿梭花園之間,你會見到 3,000 幾個玫瑰叢,栽培品種多達 200 個,仲有維也納知名偉人嘅紀念碑穿插其中,包括出自奧地利雕刻家 Hans Bitterlich 手筆嘅伊利沙伯皇后 (Empress Elisabeth) 雕像。人民公園係內城區 (Innere Stadt) 霍夫堡宮 (Hofburg Palace) 嘅一部分,而霍夫堡宮而家就係奧地利總統官邸。

    地點: 1010 Vienna, Austria

    地圖
    • 伴侶
    • 拍照
    9

    品嚐維也納炸牛扒同沙哈朱古力蛋糕

    品嚐維也納風味

    維也納炸牛扒 (wiener schnitzel) 即係蘸上麵包糠油煎嘅薄切牛仔肉,係維也納必試嘅肉類佳餚;而斯蒂芬廣場附近 (Stephansplatz) 嘅 Figlmüller,同埋 Neubaugasse 街上「土炮味」比較重嘅 Schnitzelwirt 都係維也納市中心食炸牛扒嘅知名老字號。至於甜品方面,就要 order 一客維也納鼎鼎大名嘅沙哈朱古力蛋糕 (Sachertorte) 喇!佢由兩層鬆軟蛋糕夾住一層杏果醬炮製,原創配方一路由維也納薩赫酒店 (Hotel Sacher Wien) 秘密留存,仲搞到要同位於科馬克 (Kohlmarkt) 嘅 Demel 餅店打官司添…講到咁樣,唔使問都知—呢兩間舖頭肯定係細味呢款邪惡美食嘅最佳選擇啦!

    • 品嚐美食
    10

    喺維也納國家歌劇院睇場歌劇,為全日行程劃上句號

    維也納藝術文化嘅殿堂級樞紐

    維也納嘅藝術同文化內涵豐富,而維也納國家歌劇院 (Vienna State Opera House) 正正就係呢座城市嘅驕傲之一,亦都係遊覽奧地利首都嘅必到景點。呢座歌劇院嘅歷史可以追溯到 1860 年代,至今仍然宏偉壯觀,大堂飾有氣派奢華嘅壁畫同佈置,加上優雅嘅中場休息室,你一踏入場內就可以體會到:以前睇歌劇,真係比而家去戲院睇戲嚟得更有趣、更堂皇、更令人雀躍架!之不過,至靚好位嘅票價喺 EUR100 至 EUR200 之間,又的確係貴過熱門新戲多多聲嘅 (笑~)…

    地點: Opernring 2, 1010 Wien, Austria

    開放時間: 大部分節目喺每晚 19:30 開場,千祈咪遲到!

    電話: +43 1 514442250

    地圖
    • 伴侶
    • 晚間娛樂
    • 豪華住宿
    Ari Gunadi | 旅遊常客

    開始計劃行程

    Maps