台中酒店

搜尋酒店

  • 大部分客房均可立即付款或入住酒店時付款
  • 大部分客房均免收取消費用
  • 價格保證

台中自由行

台中簡介

台中市位處台灣中心樞紐,自高鐡及往返香港與台中嘅直航機開通之後,嚟台中旅遊嘅港人越嚟越多。呢個多元化嘅城市,集潮流、文化、歷史、美食同大自然於一身。無論你係咪鐘意追求潮流時尚、探索歷史古蹟、偏好藝術交流、享受人間美食、體驗廟會文化、或者係親親大自然,台中必定係個值得你一去再去嘅地方。聽到呢度,仲唔快啲 Plan 下你個台中行程,嚟個台中自由行?

台中觀光景點

台中觀光景點多不勝數;國立台灣美術館係目前亞洲最大嘅美術館,藏有豐富嘅美術典藏、雕塑精品,相當值得一去。好山好水嘅台中,擁有無數大自然靚景,包括武陵國家森林遊樂區、太魯閣國家公園等,高美濕地嘅日落景色仲係你我影相呃「LIKE」嘅必去景點。鐘意探索歷史古蹟同宗教文化嘅話,可以去台中嘅孔廟、忠烈祠等,各具歷史價值。想要體驗台灣獨特嘅廟會文化,咁又點可以錯過著名嘅大甲媽祖遶境;每年農曆三月初一,大甲鎮瀾宮嘅媽祖會徒步到嘉義新港奉天宮進行 8 天 7 夜嘅遶境進香,沿途伴隨參拜嘅善信,萬人空巷,嗰種虔誠與熱鬧嘅場面,定會令你留下難忘印象。 去台中旅行又點少得 Shopping 同食好嘢呢?想要買流行時尚服飾,就一定要去天津服飾商圈,遊走各大商場。喺台灣,行夜市食小食係重要嘅一環;台中有著名嘅逢甲夜市、中華路夜市等。世界知名嘅台灣珍珠奶茶,第一始創店就係喺台中嘅精明一街。吃喝玩樂之餘,不忘要選購台中最馳名嘅太陽餅、綠豆椪等特產做手信。

台中酒店

台中有多種酒店選擇;民宿、汽車旅館、商務旅館、精品旅館以至星級酒店,配合不同需要嘅旅客。喺台灣,入住民宿係很普遍同受歡迎嘅選擇,皆因裝修特別、富故事性,通常每間房間都有唔同嘅獨立主題,而且價格合理,位於山上嘅民宿更係風景怡人,有遠離繁囂嘅清新感覺。 為數不少嘅商務旅館,規模較小,但簡潔舒適,價格大眾化。汽車旅館 (俗稱摩鐡) 及星級酒店,其中有些取名為精品旅館,內裡裝修豪華,房間寬敞;餐廳、泳池、健身室、水療按摩等配套設施通通都有。

台中住宿選擇

台中絕大部份嘅酒店都位於市中心區域,當中以台中火車站周邊最集中,嗰度係台中交通嘅重要樞紐,長途巴士總站同埋火車站均設於此,各類型酒店、旅館林立,方便旅客及公幹人士。 另外,市中心區域旁邊嘅南屯區及西屯區都有好多酒店;南屯區較多汽車旅館,而西屯區因靠近高速公路,亦有唔少酒店位於此區。

如何前往台中

由香港去台中清泉崗機場直航航程只需 1 小時 45 分鐘左右。到達後可以坐巴士或者的士前往市中心。台中市內嘅公共交通工具有巴士和的士,當中以巴士為主,分別由唔同巴士公司經營。興建中嘅台中捷運系統,設有多條路線,將貫通整個台中市主要區域。 另外,好多港人會選擇喺台中租車自駕遊,遊覽台中市及周邊縣市嘅各大風景區。對外交通則有長途巴士、火車、高鐡貫通台灣各省市。